దిల్లీ మార్కెట్‌లో బాంబు,పాక్‌ సరిహద్దులో ఐఈడీ

ఒకే రోజు మూడు ఘటనలతో కలకలం

దిల్లీ: గణతంత్ర దినోత్సవానికి కొద్ది రోజుల ముందు దేశంలోని మూడు వేర్వేరు ప్రాంతాల్లో పేలుడు పదార్ధాలను గుర్తించడం కలకలం రేపింది. భద్రత సిబ్బంది సకాలంలో స్పందించడంతో పెను ప్రమాదం తప్పింది. శుక్రవారం దిల్లీలోని గాజీపుర్‌ పూలమార్కెట్‌లో బాంబు లభ్యమైంది. స్థానికుల సమాచారంతో అప్రమత్తమైన దిల్లీ పోలీసులు.. బాంబ్‌స్క్వాడ్‌, ఎన్‌ఎస్‌జీని రంగంలోకి దించారు. బాంబును స్వాధీనం చేసుకొని  అందులో ఐఈడీని పూడ్చి పేల్చేసినట్టు సంబంధిత వర్గాలు తెలిపాయి.  మరోవైపు పంజాబ్‌లో ఐదు కేజీల ఐఈడీ పట్టుబడింది. డ్రగ్స్‌ ఉన్నాయన్న సమాచారంతో అట్టారీ-వాఘా సరిహద్దుకు వెళ్లిన పోలీసులకు.. ఐఈడీ కనిపించింది.  ఇవి పాకిస్థాన్‌ నుంచే వచ్చాయని అమృత్‌సర్‌ స్పెషల్‌ టాస్క్‌ఫోర్స్‌ ఏఐజీ రశ్‌పాల్‌ సింగ్‌ తెలిపారు. జమ్మూ-కశ్మీర్‌లోని శ్రీనగర్‌ ఖవ్జాబజార్‌లో ప్రెషర్‌ కుక్కర్‌లో అమర్చిన గ్రెనేడ్‌ను పోలీసులు గుర్తించారు.