దిగివస్తున్న కొవిడ్‌ ‘ఆర్‌-వాల్యూ’

1.57కి తగ్గుముఖం..
రెండు వారాల్లో గరిష్ఠ స్థాయికి మూడో వేవ్‌
ఐఐటీ మద్రాస్‌ తాజా విశ్లేషణ

దిల్లీ: దేశంలో కరోనా మహమ్మారి ఉద్ధృతి కొనసాగుతున్న నేపథ్యంలో.. ఐఐటీ మద్రాస్‌ కాస్త ఊరటనిచ్చే కబురు చెప్పింది. వైరస్‌ వ్యాప్తి తీరును సూచించే ‘ఆర్‌-వాల్యూ’ ఈ వారం (జనవరి 14-21)లో 1.57కి తగ్గినట్లు వెల్లడించింది. అయితే రానున్న రెండు వారాల్లో కొవిడ్‌ మూడో ఉద్ధృతి (వేవ్‌) గరిష్ఠస్థాయికి చేరుతుందని విశ్లేషించింది. కొవిడ్‌ సోకిన ఒక వ్యక్తి నుంచి ఇతరులకు ఇన్‌ఫెక్షన్‌ ఏ స్థాయిలో వ్యాపిస్తుందో తెలిపేదే ఆర్‌-వాల్యూ. ఇది 1 కంటే తక్కువగా ఉంటే వైరస్‌ వ్యాప్తి తగ్గుముఖం పట్టినట్లు పరిగణిస్తారు.

* ముంబయి, కోలకతాల్లో ఆర్‌-వాల్యూ వరుసగా 0.67, 0.56గా ఉంది. ఈ లెక్కన ఈ రెండు నగరాల్లో కొవిడ్‌ గరిష్ఠ దశ ముగిసినట్లేనని, ఇక్కడ మహమ్మారి ‘ఎండమిక్‌’ స్థాయికి చేరిందని గణిత విభాగం అసిస్టెం్ ప్రొఫెసన్‌ డాక్టర్‌ జయంత్‌ ఝా తెలిపారు. కాగా చెన్నై (1.2), దిల్లీ (0.98)ల్లో ఆర్‌-వాల్యూ 1కి అటూ ఇటుగా ఉంది.

* దేశంలో మూడో వేవ్‌ ఫిబ్రవరి 1-15 మధ్య గరిష్ఠ స్థాయికి చేరే అవకాశం ఉందని గతంలో అంచనా వేయగా.. తాజా విశ్లేషణలో ఫిబ్రవరి 6 వరకు గరిష్ఠ స్థితి ఉంటుందని పేర్కొన్నారు.

కొత్తగా 3,33,533 మందికి కొవిడ్‌..

దేశంలో వరుసగా నాలుగో రోజు (ఆదివారం) 3 లక్షలకు పైగా కొవిడ్‌ కేసులు నమోదయ్యాయి. గత 24 గంటల్లో 3,33,533 మంది కరోనా బారిన పడగా.. 525 కొవిడ్‌ మరణాలు నమోదయ్యాయి. క్రియాశీలక కేసుల సంఖ్య 21,87,205 (5.57%)కు పెరిగింది. మొత్తం కేసుల సంఖ్య 3,92,37,264కి చేరగా.. ఇంతవరకు 4,89,409 మందిని మహమ్మారి బలి తీసుకుంది.