ప్రజలకు మరింత చేరువగా భాజపా

ఆ పార్టీ ఓబీసీ మోర్చా జాతీయ అధ్యక్షుడు డాక్టర్‌ లక్ష్మణ్‌

ఈనాడు, దిల్లీ: ప్రజలకు మరింత చేరువగా పార్టీని చేర్చాలని ప్రధాని తమకు దిశానిర్దేశం చేసినట్లు భాజపా ఓబీసీ మోర్చా జాతీయ అధ్యక్షుడు డాక్టర్‌ కె.లక్ష్మణ్‌ తెలిపారు. దిల్లీలో ఆదివారం ఆయన విలేకరులతో మాట్లాడారు. ప్రధాని నరేంద్ర మోదీ శనివారం అన్ని మోర్చాల అధ్యక్షులు, ప్రధాన కార్యదర్శులతో నాలుగున్నర గంటల పాటు భేటీ అయ్యారని తెలిపారు. ఏడేళ్లలో ప్రభుత్వం సాధించిన విజయాలు, ఆయా వర్గాలకు చేసిన ప్రయోజనాలను ప్రజల దృష్టికి తీసుకెళ్లాల్సిన బాధ్యత ఆయామోర్చాలపై ఉందని తెలిపినట్లు చెప్పారు. మండల స్థాయి నుంచి పార్టీని సంస్థాగతంగా బలోపేతం చేయడంతో పాటు ప్రజలకు మరింత చేరువ చేయాల్సిన తీరుపై జాతీయ అధ్యక్షుడు జె.పి.నడ్డా, ప్రధాన కార్యదర్శి బి.ఎల్‌.సంతోష్‌ (సంస్థాగత) మార్గనిర్దేశం చేశారని లక్ష్మణ్‌ తెలిపారు.