Assembly Elections 2022: మార్చి 10 తర్వాత బుల్‌డోజర్లు పనిచేస్తాయి: యూపీ సీఎం యోగి

మైన్‌పురీ: ‘రాష్ట్రంలోని బుల్‌డోజర్లు మొత్తం మరమ్మతులకు పంపాం. మార్చి 10 (ఓట్ల గణన) తర్వాత అన్నీ పనిచేస్తాయి’ అని ఉత్తర్‌ప్రదేశ్‌ సీఎం యోగి ఆదిత్యనాథ్‌ వ్యాఖ్యానించారు. రాష్ట్రంలోని నేరగాళ్లపై తమ ప్రభుత్వం అనుసరించే వైఖరి గురించి చెబుతూ ఆయన ఈ వ్యాఖ్యలు చేశారు. శుక్రవారం మైన్‌పురీ ఎన్నికల సభలో యోగి మాట్లాడారు. యూపీ అసెంబ్లీ ఎన్నికల్లోనూ బుల్‌డోజర్లకు పని చెబుతారా అని సమాజ్‌వాదీ పార్టీ నేత అడిగిన ప్రశ్నకు జవాబుగా తాను ఈ మాటలంటున్నట్లు వివరించారు. యంత్రాలకు కూడా విశ్రాంతి అవసరం కదా అన్నారు. అక్రమ ఆస్తుల విధ్వంసానికి తమ ప్రభుత్వం బుల్‌డోజర్లను వాడుతుందని చెప్పారు. గత నాలుగున్నర సంవత్సరాలుగా కలుగుల్లో దాక్కొన్నవారంతా ఎన్నికల ప్రకటనతో బయటికొచ్చి అరుస్తున్నారని ఎద్దేవా చేశారు.