Komatireddy: నల్గొండకు వేరే నాయకుల అవసరం లేదు: కోమటిరెడ్డి వెంకట్‌రెడ్డి

గాంధీభవన్‌, న్యూస్‌టుడే: ఉమ్మడి నల్గొండ జిల్లాకు వేరే నాయకుల అవసరం లేదని ఎంపీ, కాంగ్రెస్‌ స్టార్‌ క్యాంపెయినర్‌ కోమటిరెడ్డి వెంకట్‌రెడ్డి వ్యాఖ్యానించారు. జిల్లాలో కాంగ్రెస్‌ పటిష్ఠంగా ఉందని పేర్కొన్నారు. గురువారం ఆయన ఇక్కడ తన నివాసంలో విలేకరుల సమావేశంలో మాట్లాడారు. కాంగ్రెస్‌ అగ్రనేత రాహుల్‌గాంధీ వరంగల్‌ బహిరంగ సభకు సంబంధించి జనసమీకరణ, ఏర్పాట్లపై పీసీసీ అధ్యక్షుడు రేవంత్‌రెడ్డి శుక్రవారం ఉమ్మడి నల్గొండలో పార్టీ శ్రేణులతో తలపెట్టిన సన్నాహక సమావేశం నేపథ్యంలో కోమటిరెడ్డి పై విధంగా స్పందించారు. సొంత నియోజకవర్గంలో కేంద్రమంత్రి నితిన్‌ గడ్కరీ అభివృద్ధి కార్యక్రమాలు ఉండటం వల్ల రేవంత్‌ కార్యక్రమానికి వెళ్లడం లేదన్నారు. కాంగ్రెస్‌తో పొత్తుకు కేసీఆర్‌ అడిగారని కోమటిరెడ్డి తెలిపారు. కాంగ్రెస్‌ అధిష్ఠానం అంగీకరించలేదని చెప్పారు. తన నియోజకవర్గంలో ప్రాజెక్టుల పూర్తికి తక్షణమే నిధులు మంజూరు చేసి వాటిని పూర్తి చేయాలని డిమాండ్‌ చేశారు.