ఇక్కడ సమస్యలు వదిలేసి.. ఇతర రాష్ట్రాల్లో ఏం ఉద్ధరిస్తారు?

ముఖ్యమంత్రి కేసీఆర్‌పై ఈటల ధ్వజం

ఈనాడు, హైదరాబాద్‌: రాష్ట్రంలో సమస్యలు పరిష్కరించలేని ముఖ్యమంత్రి కేసీఆర్‌ ఇతర రాష్ట్రాలకు వెళ్లి ఏం ఉద్ధరిస్తారని భాజపా ఎమ్మెల్యే ఈటల రాజేందర్‌ ప్రశ్నించారు. ప్రధానమంత్రి నరేంద్రమోదీ హైదరాబాద్‌కు వస్తుంటే మొహం చెల్లకే సీఎం దిల్లీ, ఇతర రాష్ట్రాల పర్యటనకు వెళ్లారని అన్నారు. ఈటల శనివారం భాజపా కార్యాలయంలో విలేకరులతో మాట్లాడారు. అనేకసార్లు గెలిచి, ఎంతో అనుభవం ఉన్న సీఎం దిల్లీకి వెళ్లి అక్కడ విద్య, వైద్య రంగాల పరిస్థితిని పరిశీలిస్తున్నారంటే తెరాస ప్రభుత్వం ఆ రంగాలపై నిబద్ధత చూపనట్లేనని విమర్శించారు.