రేపటి నుంచి మోదీ పాలన 8వ వార్షికోత్సవాలు: భాజపా

దిల్లీ: నరేంద్ర మోదీ పాలన 8వ వార్షికోత్సవాలను రెండు వారాల పాటు ఘనంగా నిర్వహించాలని భారతీయ జనతా పార్టీ నిర్ణయించింది. ఈ నెల 30 నుంచి వచ్చే నెల 14 వరకూ దేశవ్యాప్తంగా ప్రత్యేక కార్యక్రమాలకు రూపకల్పన చేసింది. పార్టీ జాతీయ ప్రధాన కార్యదర్శి అరుణ్‌సింగ్‌ శనివారం మీడియా సమావేశంలో ఈ వివరాలు వెల్లడించారు. ‘‘మోదీ నేతృత్వంలోని కేంద్ర ప్రభుత్వ ప్రాధాన్యాలైన సేవ- సుపరిపాలన- పేదల సంక్షేమానికి తీసుకున్న చర్యలను ప్రజల్లోకి విస్తృతంగా తీసుకెళతాం. ఇందులో భాగంగా బూత్‌స్థాయి నుంచి జాతీయస్థాయి వరకూ ప్రజలను కలిసేందుకు ప్రత్యేకంగా 75 గంటల కార్యక్రమాన్ని చేపడుతున్నాం. కొవిడ్‌ కారణంగా తల్లిదండ్రులు మృతి చెందిన అనాథలైన పిల్లలకు మే 30న ప్రధాని చెక్కులు పంపిణీ చేస్తారు. వారికి ఉపకార వేతనాలపై ప్రకటన చేస్తారు’’ అని అరుణ్‌సింగ్‌ వెల్లడించారు.