Krishnapatnam: కృష్ణపట్నం వచ్చి ఇబ్బందులు పడొద్దు

ఏపీలోని ప్రతి జిల్లాకు మందు సరఫరా: ఆనందయ్య

కృష్ణపట్నం, న్యూస్‌టుడే: ఏపీలోని ప్రతి జిల్లాలో ఐదు వేల మంది కరోనా బాధితులకు మందు ఉచితంగా అందజేస్తామని నెల్లూరు జిల్లా కృష్ణపట్నానికి చెందిన ఆనందయ్య ప్రకటించారు. ఆదివారం రాత్రి మీడియాకు విడుదల చేసిన ఓ వీడియోలో ఆయన మాట్లాడుతూ.. తొలుత సర్వేపల్లి నియోజకవర్గంలో ఎమ్మెల్యే కాకాణి గోవర్ధన్‌రెడ్డి చేతుల మీదుగా మందు పంపిణీ ప్రారంభిస్తాం. జిల్లా అధికారులు పంపిణీపై నిర్ణయం తీసుకుంటారు. ఇతర ప్రాంతాల వారు కృష్ణపట్నం వచ్చి ఇబ్బందులు పడవద్దు. మిగతా ప్రాంతాలకు పంపిణీ ఎప్పుడనేది త్వరలో ప్రకటిస్తామ’ని వివరించారు. మరోపక్క, ఆదివారం స్థానికులు, పరిసర ప్రాంతాల వారు కృష్ణపట్నం రాగా వారికి పరిమితంగా ఔషధాలు అందించారు. ఓ దశలో స్వల్ప తోపులాట జరిగింది. పోలీసుల పర్యవేక్షణ లేకపోవడంతో కొవిడ్‌ నిబంధనలకు విరుద్ధంగా రద్దీ నెలకొంటోంది.