పేస్కేలు అమలు చేయాలని వీఆర్‌ఏల నిరసన

ఈనాడు, హైదరాబాద్‌: గ్రామ రెవెన్యూ సహాయకులకు ప్రభుత్వం ఇచ్చిన హామీలను నెరవేర్చాలంటూ శుక్రవారం పలు జిల్లాల్లో వీఆర్‌ఏలు నిరసనలు తెలిపారు. అనంతరం సమస్యలకు సంబంధించి ఉన్నతాధికారులకు వినతిపత్రాలు అందజేశారు. వీరి ఇబ్బందులపై శుక్రవారం హైదరాబాద్‌లో తెలంగాణ డైరెక్ట్‌ రిక్రూట్‌ వీఆర్‌ఏల అసోసియేషన్‌ రాష్ట్ర అధ్యక్షుడు వై.వెంకటేశం, ప్రధాన కార్యదర్శి కె.బాపుదేవ్‌ ఓప్రకటన విడుదల చేశారు. ప్రభుత్వం శాసనసభలో పేస్కేలు, పదోన్నతులపై ఇచ్చిన హామీని వెంటనే అమలు చేయాలన్నారు. ఈనెల 24న కామారెడ్డి జిల్లా మాచారెడ్డి మండలం ఘన్‌పూర్‌ గ్రామ వీఆర్‌ఏ రమేశ్‌ ఆర్థిక సమస్యలతో ఆత్మహత్య చేసుకోవడం వెనుక పేస్కేలు అమలుకాకపోవడమే కారణమన్నారు. గతేడాది వీఆర్వో వ్యవస్థ రద్దు చేయడంతో వీఆర్‌ఏలకు పదోన్నతులులేకుండా పోయాయని ఆవేదన వ్యక్తం చేశారు.