యాదాద్రిలో ‘కార్తిక’ కోలాహలం

బాలాలయ ప్రాంగణంలో భక్తజనం

యాదగిరిగుట్ట, న్యూస్‌టుడే: కార్తిక మాసం చివరి ఆదివారం సందర్భంగా ప్రముఖ పుణ్యక్షేత్రమైన యాదాద్రి శ్రీలక్ష్మీనరసింహ స్వామి దేవస్థానం భక్తజనులతో కోలాహలంగా మారింది. హరి, హరుల క్షేత్ర సందర్శనకు తెలుగు రాష్ట్రాల భక్తులు అధికసంఖ్యలో తరలివచ్చారు. పంచ నారసింహులను దర్శించి, పూజలు నిర్వహించారు. క్యూ షెడ్లు, మండపాలు భక్తులతో కిటకిటలాడాయి. కొండ కింద పాత గోశాల ప్రాంగణంలో నిర్వహించిన శ్రీసత్యనారాయణ స్వామి సామూహిక వ్రతాల్లో 1215 జంటలు పాల్గొన్నాయి. ఆలయానికి ఆదివారం రూ.37,09,808 ఆదాయం సమకూరినట్లు ఈవో గీత తెలిపారు.