ప్రాథమిక పాఠశాలల్లోనే అంగన్‌వాడీ కేంద్రాలు

ఈనాడు, హైదరాబాద్‌: రాష్ట్రంలో అంగన్‌వాడీ కేంద్రాలను ప్రాథమిక పాఠశాలల్లోనే నిర్వహించాలని నిర్ణయించినట్లు మంత్రులు సత్యవతి రాథోడ్‌, సబితా ఇంద్రారెడ్డి తెలిపారు. తద్వారా వారిని ప్రాథమిక విద్యకు మానసికంగా సంసిద్ధం చేసేందుకు వీలవుతుందని వారు పేర్కొన్నారు. గురువారమిక్కడ విద్యాశాఖ, శిశు సంక్షేమశాఖ అధికారులు సందీప్‌కుమార్‌ సుల్తానియా, దివ్య దేవరాజన్‌, దేవసేనతో కలిసి మంత్రులు సమీక్ష నిర్వహించారు. రాష్ట్రంలో 12,219 కేంద్రాలు అద్దె భవనాల్లో కొనసాగుతున్నాయని, వీటిని వీలైనంత త్వరగా ప్రాథమిక పాఠశాలలకు తరలించేందుకు చర్యలు తీసుకోవాలని అధికారులను ఆదేశించారు. అనంతరం స్టేట్‌హోమ్‌ పిల్లలకు ‘సేవ్‌ ది చిల్డ్రన్‌’ సంస్థ అందజేసిన బ్యాగులను మంత్రులు పంపిణీ చేశారు.