పాఠశాల విద్యాశాఖలో భోగి రోజూ సెలవు కరవు

40 రోజులుగా అర్ధరాత్రి వరకు విధులు

ఈనాడు, హైదరాబాద్‌:  కొత్త జిల్లాల వారీగా ఉపాధ్యాయుల కేటాయింపు, పోస్టింగులు, తప్పుల సవరణ తదితర పనులతో పాఠశాల విద్యాశాఖ అధికారులకు 40 రోజులుగా సెలవులు కరవయ్యాయి. రెండో శనివారం, ఆదివారాలు కూడా ఇప్పటివరకు అధికారులు పనిచేశారు. కొన్ని సార్లు తెల్లవారుజామున 4 గంటల వరకు కూడా కార్యాలయంలోనే ఉన్నారు. తాజాగా పాఠశాల విద్యాశాఖ డైరెక్టరేట్‌లోని అధికారులు శుక్రవారం (భోగి పండుగ) నాడు కూడా కార్యాలయానికి వచ్చి రాత్రి 9 గంటల వరకు విధులు నిర్వహించారు. గెజిటెడ్‌ ప్రధానోపాధ్యాయులకు పోస్టింగులు ఇవ్వడంపై విద్యాశాఖ కార్యదర్శి సుల్తానియా, పాఠశాల విద్యాశాఖ సంచాలకురాలు శ్రీదేవసేన అధికారులతో శుక్రవారం మధ్యాహ్నం సమావేశం నిర్వహించారు. ఇప్పటికే ఒక అధికారి అనారోగ్యంతో సెలవు పెట్టారు. సంక్రాంతి రోజు శనివారం కూడా వారికి సెలవు లేనట్లు తెలిసింది.