17నుంచి ఇంజినీరింగ్‌ విద్యార్థులకు ఆన్‌లైన్‌ తరగతులు

ఈనాడు, హైదరాబాద్‌: రాష్ట్రంలోని ఇంజినీరింగ్‌ తరగతులను ఈ నెల 17 నుంచి 22 వరకూ(తొలిదశలో) ఆన్‌లైన్‌లో నిర్వహించాలని జేఎన్‌టీయూ నిర్ణయించింది. కరోనా కేసులు పెరుగుతున్న దృష్ట్యా ఈ మేరకు ఉత్తర్వులు జారీ చేసింది. మూడు, నాలుగో ఏడాది మొదటి సెమిస్టర్‌ ఎక్స్‌టర్నల్‌ పరీక్షలను థియరీ పరీక్షల తర్వాత నిర్వహించనుంది. మూడు, నాలుగు ఏడాది చదివే విద్యార్థులకు మిడ్‌టర్మ్‌ పరీక్షలు ఆన్‌లైన్‌ లేదా ఆఫ్‌లైన్‌లో నిర్వహించుకునేలా కళాశాలలకు వెసులుబాటు కల్పించింది. ఈ మేరకు జేఎన్‌టీయూ ఉపకులపతి ప్రొ.కట్టా నర్సింహారెడ్డి తెలిపారు. కళాశాలలకు ఆన్‌లైన్‌ తరగతులకు అవకాశం ఇచ్చిన నేపథ్యంలో ఫ్యాకల్టీని యాజమాన్యాలు యథావిధిగా కొనసాగించాలని, విధుల నుంచి తొలగిస్తే ఆందోళనకు దిగుతామని తెలంగాణ సాంకేతిక, ప్రొఫెషనల్‌ కళాశాలల ఉద్యోగుల సంఘం వి.బాలకృష్ణారెడ్డి తెలిపారు.