కోతుల పంటే పండింది

ఉలవ పంటను పాడుచేస్తున్న వానర మూక

ఒక్క కోతి చాలంటారు.. ఊరంతా పీకి పందిరేసేందుకు.. అలాంటిది గుంపులు గుంపులుగా అవి దండెత్తి వస్తే తట్టుకోవటం బహు కష్టమే.. సూర్యాపేట జిల్లాలోని కొన్ని ప్రాంతాల్లో వానరాల బెడద తీవ్రమవుతోంది. అదిలించడానికి వెళ్లేవారిపై అవి దాడిచేస్తున్నాయి. చివ్వెంల మండలం వల్లభాపురంలో రెండెకరాల పొలంలో వీరయ్య అనే రైతు ఉలవ పంట వేశారు. గింజలొచ్చే సమయానికి వానరమూక పొలంలో వాలిపోయింది. పంట మొత్తం పాడుచేసింది. వేరుసెనగ లాంటి ఆరుతడి పంటలు సాగుచేస్తే చేతికందే పరిస్థితి ఉండడంలేదని ఉలవ పంట వేసినా.. కోతులు దక్కనీయటం లేదని వీరయ్య వాపోయారు. దాదాపు రూ.50 వేల విలువైన పంట పోయిందని ఆవేదన వ్యక్తం చేశారు.

- ఈనాడు, సూర్యాపేట