విధులు కేటాయించని ఉద్యోగుల వివరాలివ్వండి

లేదంటే ప్రధాన కార్యదర్శి హాజరుకావాల్సి ఉంటుంది

ప్రభుత్వానికి హైకోర్టు ఆదేశం

ఈనాడు, హైదరాబాద్‌: రాష్ట్రంలో అన్ని ప్రభుత్వ శాఖల్లో వివిధ కారణాల వల్ల విధులు కేటాయించని అధికారుల వివరాలు సమర్పించాలంటూ సర్కారుకు మంగళవారం హైకోర్టు ఆదేశాలు జారీ చేసింది. కారణాలను పేర్కొంటూ పూర్తి వివరాలతో కౌంటరు దాఖలు చేయాలని సూచించింది.లేనిపక్షంలో ప్రభుత్వ ప్రధాన కార్యదర్శి హాజరై వివరణ ఇవ్వాలని స్పష్టం చేసింది. విచారణను మార్చి 14కి వాయిదా వేసింది. పోస్టింగులు ఇవ్వకుండా నెలలు, ఏళ్ల తరబడి ఖాళీగా ఉంచుతూ ప్రభుత్వ సొమ్మును వృథా చేస్తుండటాన్ని సవాలు చేస్తూ సికింద్రాబాద్‌కు చెందిన బి.నాగేందర్‌సింగ్‌ 2020లో ప్రజాప్రయోజన వ్యాజ్యం దాఖలు చేశారు. దీనిపై ప్రధాన న్యాయమూర్తి జస్టిస్‌ సతీష్‌చంద్ర శర్మ, జస్టిస్‌ అభినంద్‌కుమార్‌ షావిలిలతో కూడిన ధర్మాసనం మంగళవారం మరోసారి విచారణ చేపట్టింది. పిటిషనర్‌ తరఫు న్యాయవాది ఎం.వెంకన్న వాదనలు వినిపిస్తూ క్రమశిక్షణ చర్యలు, రాష్ట్ర విభజన నేపథ్యంలో ఆంధ్రప్రదేశ్‌ నుంచి ఇక్కడికి వచ్చినవారు, ఇతర శాఖల నుంచి బదిలీపై వచ్చినవారు తదితర శాఖల ఉద్యోగులకు పోస్టింగులు ఇవ్వకపోవడంతో ఖజానాకు రూ.కోట్ల నష్టం వాటిల్లుతోందన్నారు. ఎలాంటి సేవలు పొందకుండానే రూ.3 కోట్ల దాకా చెల్లించినట్లు తేలిందన్నారు.