అమెరికా విమానాల రద్దుతో ఇబ్బందులు

ఈనాడు, హైదరాబాద్‌, శంషాబాద్‌, న్యూస్‌టుడే: 5జీ సాంకేతికతతో ఎదురయ్యే ఇబ్బందుల నేపథ్యంలో అమెరికా వెళ్లే విమానాలను ఎయిరిండియా రద్దు చేస్తుండటంతో ప్రయాణికులు అవస్థలు పడుతున్నారు. బుధవారం దిల్లీ విమానాశ్రయం నుంచి అమెరికాలోని వివిధ నగరాలకు వెళ్లాల్సిన 4 విమానాలను ఎయిరిండియా రద్దు చేసింది. ఇది తెలియక హైదరాబాద్‌ విమానాశ్రయం నుంచి దిల్లీ మీదుగా అమెరికా వెళ్లాల్సిన ప్రయాణికులు శంషాబాద్‌ ఎయిర్‌పోర్టుకు చేరుకున్నారు. విషయం తెలుసుకుని ఆందోళనకు దిగారు. దాదాపు 65 మంది ప్రయాణికులు ఎయిరిండియా తీరుపై నిరసన తెలిపారు. మరోవైపు శుక్రవారం హైదరాబాద్‌ విమానాశ్రయం నుంచి నేరుగా షికాగోకు విమాన సర్వీసు ఉంది. ఆలోగా సమస్య పరిష్కారం కాకపోతే విమానం నడుస్తుందా.. లేదా.. అన్న సందిగ్ధత నెలకొంది.