నిర్మాణ ధరలు పెంచాలి

మంత్రికి గుత్తేదారుల వినతి

ఈనాడు, హైదరాబాద్‌: నిర్ణీత ప్రమాణ నిర్మాణ(ఎస్‌ఎస్‌ఆర్‌) ధరలు పెంచాలని, రాష్ట్రంలోని రెండు విద్యుత్‌ పంపిణీ సంస్థ(డిస్కం)ల పరిధిలో అవి ఒకే విధంగా ఉండేలా నిర్ణయించాలని  మంత్రి జగదీశ్‌రెడ్డికి తెలంగాణ విద్యుత్‌ కాంట్రాక్టర్ల సంఘం విన్నవించింది. ఆదివారం మంత్రిని సంఘ సభ్యులు కలసి సమస్యలు వివరించారు. ట్రాన్స్‌కో సీఎండీ దేవులపల్లి ప్రభాకరరావు కూడా ఇందులో పాల్గొన్నారు. ప్రస్తుత రెండు డిస్కం ధరల మధ్య ఉన్న వ్యత్యాసాన్ని వారు మంత్రికి వివరించారు. అంతేగాకుండా విద్యుత్‌ కాంట్రాక్టు పనులకు అధికారులు రూపొందించే అంచనా వ్యయాలలో కార్మికులకు ఇచ్చే ఈఎస్‌ఐ, పీఎఫ్‌, ఇతర రుసుములు కలపాలని కోరారు. కార్యక్రమంలో సంఘ అధ్యక్షుడు శివకుమార్‌ ప్రధాన కార్యదర్శి ఎస్‌కే మాజిద్‌, పర్వతాలు అన్ని జిల్లాల అధ్యక్ష, కార్యదర్శులు పాల్గొన్నారు.