వామపక్ష తీవ్రవాద బాధితులకు ఏం చేశారు?

తెలుగు రాష్ట్రాలకు ఎన్‌సీఎస్‌టీ నోటీసులు

దిల్లీ: వామపక్ష తీవ్రవాదం కారణంగా నిర్వాసితులైన గిరిజన కుటుంబాల గుర్తింపు, పునరావాసానికి ఎలాంటి చర్యలు తీసుకున్నారో నివేదిక ఇవ్వాలంటూ తెలంగాణ, ఆంధ్రప్రదేశ్‌కు గిరిజనుల జాతీయ కమిషన్‌ (ఎన్‌సీఎస్‌టీ) తాజాగా నోటీసులిచ్చింది. ఇదే విషయమై సర్వే నిర్వహించాలని 2019లోనే తెలుగు రాష్ట్రాలను ఎన్‌సీఎస్‌టీ, కేంద్ర గిరిజన వ్యవహారాల మంత్రిత్వ శాఖలు కోరాయి కొవిడ్‌ కారణంగా ఈ సర్వే చేపట్టలేకపోతున్నామంటూ రెండు రాష్ట్రాలు చెబుతూ వస్తున్నాయి. ఈ నేపథ్యంలోనే ఈనెల 12న మరోమారు నోటీసులిచ్చామని, 30 రోజుల్లోపు నివేదిక కోరామని ఎన్‌సీఎస్‌టీ అధికారి తెలిపారు. ఛత్తీస్‌గఢ్‌లో మావోయిస్టులు, సల్వాజుడుంల పోరు కారణంగా సుమారు 50 వేల మంది గిరిజనులు ఒడిశా, ఆంధ్రప్రదేశ్‌, తెలంగాణ, మహారాష్ట్రలోని అడవుల్లో 248 చోట్ల స్థిరపడ్డారని.. ఎలాంటి గుర్తింపు లేకుండా, దయనీయ పరిస్థితుల్లో జీవిస్తున్నారని గిరిజన హక్కుల ఉద్యమకారుడు శుభ్రాంసు చౌధరి తెలిపారు.