నమ్మండి.. ఇది ఆరోగ్య కేంద్రమే!

మీరు చూస్తున్న ఈ చిత్రాలు హైదరాబాద్‌ నడిబొడ్డున ఉన్న ముషీరాబాద్‌ పట్టణ ఆరోగ్య కేంద్రంలోనివి. మొదటి చిత్రంలో ఉన్నది క్షయ నిరోధక కేంద్రమైతే రెండోది కరోనా నిర్ధారణ పరీక్ష కేంద్రం. జనం ఇక్కడికి వచ్చేందుకు భయపడుతుంటే.. పరీక్షలు నిర్వహించే సిబ్బంది బాధలు వర్ణనాతీతం. రేకుల గదిలో దోమలు, పురుగులతో పాటు పాములు తిరుగుతున్నాయని, రక్త పరీక్ష కేంద్రం వద్ద పందికొక్కుల బెడద తీవ్రంగా ఉందని సిబ్బంది వాపోతున్నారు. దీనిపై బోలక్‌పూర్‌ యూపీహెచ్‌సీ వైద్యాధికారి కృష్ణమోహన్‌ను వివరణ కోరగా ఆరోగ్య కేంద్రం ఆవరణలో కొనసాగుతున్న టీబీ కేంద్రం తమ పరిధిలోకి రాదని, అయినా ఆ విషయాన్ని ప్రభుత్వ దృష్టికి తీసుకెళ్లామన్నారు.  

 -ఈనాడు, హైదరాబాద్‌