MK Stalin:తెలంగాణ పథకాలను తమిళనాడులోనూ అమలు చేస్తాం: స్టాలిన్‌

ఈనాడు, నిజామాబాద్‌: తెలంగాణలోని రైతు సంక్షేమ పథకాలను తమ రాష్ట్రంలోనూ అమలు చేసేందుకు కృషి చేస్తామని తమిళనాడు సీఎం స్టాలిన్‌ తెలిపారని తెలంగాణ పసుపు రైతుల సంఘం రాష్ట్ర అధ్యక్షుడు కోటపాటి నర్సింహనాయుడు తెలిపారు. దక్షిణాది రాష్ట్రాల రైతు సంఘాల సమావేశం శనివారం చెన్నైలో జరిగింది. కోటపాటి నర్సింహనాయుడు అధ్యక్షతన జరిగిన సమావేశంలో తెలంగాణలో అమలవుతున్న రైతుబంధు, రైతుబీమా, 24 గంటల ఉచిత విద్యుత్తు, నీటిపారుదల ప్రాజెక్టులపై చర్చించారు. అనంతరం తమిళనాడు సీఎం స్టాలిన్‌ను కలిసినట్లు నర్సింహనాయుడు తెలిపారు. సమావేశంలో పసుపు రైతుల సంఘం జాతీయ అధ్యక్షుడు పి.కె.దైవ శిగామణి, రాష్ట్రీయ కిసాన్‌ సంఘ్‌ కర్ణాటక శాఖ అధ్యక్షుడు శాంతకుమార్‌, కేరళ శాఖ అధ్యక్షుడు జాన్‌, తమిళనాడు రాష్ట్ర అధ్యక్షుడు రామ గౌండర్‌, పుదుచ్చేరి వ్యవసాయ సంఘం అధ్యక్షులు నికోలస్‌ తదితరులు పాల్గొన్నారు.