RBI: ఏపీ రాజధాని ఎక్కడో నిర్ణయించాకే ఆర్‌బీఐ కార్యాలయం ఏర్పాటు

వినతిపై రిజర్వు బ్యాంక్‌ స్పందన

ఈనాడు, దిల్లీ: ఆంధ్రప్రదేశ్‌ ప్రభుత్వం రాష్ట్ర రాజధాని నగరం ఎక్కడో నిర్ణయించాకే తమ కార్యాలయం ఏర్పాటు చేస్తామని రిజర్వు బ్యాంక్‌ ఆఫ్‌ ఇండియా (ఆర్‌బీఐ) స్పష్టం చేసింది. నూతనంగా ఏర్పడిన ఆంధ్రప్రదేశ్‌లో ఆర్‌బీఐ కార్యాలయం ఏర్పాటు చేయాలని అమరావతి అభివృద్ధి సంస్థ ఛైర్మన్‌, అఖిల భారత పంచాయతీ పరిషత్‌ జాతీయ కార్యదర్శి జాస్తి వీరాంజనేయులు గతేడాది అక్టోబరు 12న ఆర్‌బీఐకి లేఖ రాశారు. దానిపై ఆర్‌బీఐ డిప్యూటీ మేనేజర్‌ ఎం.కె.సుభాశ్రీ స్పందిస్తూ వీరాంజనేయులుకు సోమవారం లేఖ పంపారు. నగదు నిల్వలు, సరఫరాకు సంబంధించిన పెట్టెల విషయంపైనా సుభాశ్రీ సమాధానమిచ్చారు. రాష్ట్రంలో ప్రస్తుతం 104 కరెన్సీ పెట్టెలు ఉన్నాయని తెలిపారు. ప్రతి ఆరు నెలలకు ఒకసారి జరిగే రాష్ట్ర స్థాయి సమన్వయ కమిటీ, భద్రత కమిటీల సమావేశాల్లోనూ కరెన్సీ పెట్టెల కొరతపై తమకు ఎటువంటి ఫిర్యాదులు అందలేదని పేర్కొన్నారు. ఆంధ్రప్రదేశ్‌లో కరెన్సీ నిర్వహణకు సంబంధించి తాము రాష్ట్ర పోలీసులు, అధికారులతో సమన్వయం చేసుకుంటున్నామని వెల్లడించారు.