అవయవదానానికి జగపతిబాబు సమ్మతి

వంద మంది అభిమానులు  సైతం..

ఈనాడు, హైదరాబాద్‌: సినీనటుడు జగపతిబాబు శుక్రవారం తన పుట్టినరోజును పురస్కరించుకుని అవయవదానానికి అంగీకరించారు. తన మరణాంతరం తన అవయవాలను దానం చేస్తున్నట్లు ప్రకటించారు. కిమ్స్‌ ఆసుపత్రిలో జరిగిన కార్యక్రమంలో ప్రమాణపత్రంపై సంతకం చేసి ఛైర్మన్‌ డాక్టర్‌ భాస్కరరావుకు అందించారు. 100 మంది అభిమానులు సైతం జగపతిబాబు బాటలో నడిచారు. తమ అభిమాననటుడు మాదిరి తామూ అవయవదానానికి సిద్ధమంటూ ప్రమాణ పత్రంపై సంతకం చేశారు. జగపతిబాబు మాట్లాడుతూ.. సమయానికి అవయవాలు లభించక ఎందరో చనిపోతున్నారని తెలిపారు. అవయవదానంపై మరింత చైతన్యం రావాల్సిన అవసరం ఉందన్నారు. తమకు అయినవాళ్ల ప్రాణాలు పోతున్నాయని తెలిసినా.. బాధను దిగమింగుకుని మరికొందరి ప్రాణాలు నిలబెట్టేందుకు ముందుకు రావడం గొప్ప నిర్ణయమని కిమ్స్‌ ఆసుపత్రి ఛైర్మన్‌ డాక్టర్‌ బొల్లినేని భాస్కరరావు అన్నారు. ఈ సందర్భంగా గతంలో అవయవదానం చేసిన పలువురిని ఘనంగా సన్మానించారు.