Andhra News: ఏపీలో అంగన్‌వాడీ కార్యకర్తలు, పర్యవేక్షకులకు స్మార్ట్‌ఫోన్లు

ఈనాడు, అమరావతి: వైఎస్సార్‌ సంపూర్ణ పోషణ పథకం అమలులో భాగంగా అంగన్‌వాడీ కార్యకర్తలు, పర్యవేక్షకులకు 56,984 స్మార్ట్‌ఫోన్లు అందజేయనున్నారు. ఏపీ టెక్నాలజీ సర్వీసెస్‌ సంస్థ ద్వారా వీటిని సేకరిస్తారు. ఈ మేరకు మహిళా శిశు సంక్షేమశాఖ ముఖ్య కార్యదర్శి అనురాధ శనివారం ఉత్తర్వులు జారీ చేశారు. సమీకృత శిశు అభివృద్ధి పథకం (ఐసీడీఎస్‌)లో రాష్ట్రంలోని నాలుగు జోన్ల పరిధిలో ఖాళీగా ఉన్న 560 గ్రేడ్‌-2 సూపర్‌వైజర్‌ పోస్టులను అంగన్‌వాడీ కార్యకర్తలతో భర్తీ చేయనున్నారు. ప్రభుత్వం ఏర్పాటు చేసే నియామక కమిటీ ద్వారా భర్తీ ప్రక్రియ పూర్తి చేస్తారు. ఇందుకోసం ఆంధ్రప్రదేశ్‌ పబ్లిక్‌ సర్వీస్‌ కమిషన్‌ (ఏపీపీఎస్‌సీ) సహకారం తీసుకోనున్నారు. ఈ మేరకు మహిళ శిశు సంక్షేమశాఖ ఉత్తర్వులు జారీ చేసింది.