Ukraine Crisis: కష్టాల్లోనూ పిల్లిని వదల్లేదు..

మార్జాలంతో స్వదేశం చేరుకున్న విద్యార్థి

ఓ వైపు యుద్ధం.. ఎన్నో ప్రయాసలు. ఇంతటి కష్టకాలంలోనూ తాను ఇష్టంగా పెంచుకున్న పిల్లిని వదలలేదు ఆ విద్యార్థి. దాన్ని చంకనెత్తుకుని ఖండాలు దాటి స్వదేశానికి చేరుకున్నారు. ఖమ్మం జిల్లా కల్లూరు మండలం చిన్నకోరుకొండకు చెందిన పూదూరు ప్రఖ్యాత్‌ ఉక్రెయిన్‌లో వైద్యవిద్య అభ్యసిస్తున్నారు. యుద్ధ నేపథ్యంలో భారత్‌కు వెళ్లడమెలా అని మథనపడ్డారు. అతి కష్టం మీద సరిహద్దు దాటి రొమేనియా చేరుకున్నారు. అక్కడి నుంచి భారత ప్రభుత్వం ఏర్పాటు చేసిన విమానాల్లో ప్రయాణించి శుక్రవారం హైదరాబాద్‌ చేరుకున్నారు. ఇంత శ్రమ పడినా, సాంజ అనే తన పెంపుడు మార్జాలాన్ని మరిచిపోకుండా, అపురూపంగా వెంట తెచ్చుకున్నారు. ఆ పిల్లిని తన కళాశాల అధ్యాపకురాలు బహుమతిగా ఇచ్చారని ఆయన తెలిపారు. ప్రఖ్యాత్‌ తండ్రి గతంలో అనారోగ్యంతో చనిపోగా తల్లి మణెమ్మ స్టాఫ్‌నర్సుగా పనిచేస్తున్నారు.  

- న్యూస్‌టుడే, కల్ల్లూరు