KTR: అక్కాచెల్లెళ్ల ఉన్నత విద్యకు కేటీఆర్‌ చేయూత

చదువు పూర్తయ్యేంతవరకు ఖర్చు భరిస్తానని భరోసా

ఈనాడు, హైదరాబాద్‌: పేదకుటుంబానికి చెందిన ఇద్దరు అక్కాచెల్లెళ్లు ఉన్నత విద్యనభ్యసించడానికి మంత్రి కేటీఆర్‌ చేయూతనిచ్చారు. వారి కోర్సులు పూర్తయ్యేంతవరకు తాను సాయం అందిస్తానని భరోసా ఇచ్చారు. జయశంకర్‌ భూపాలపల్లి జిల్లాకు చెందిన రాజమల్లు రోజువారి కూలీ. తన కాయకష్టంతో తన ఇద్దరు కూతుళ్లు కావేరి(21), శ్రావణి(18)లను చదివిస్తున్నారు. కావేరి ఇంటర్మీడియెట్‌లో 95 శాతం మార్కులు సాధించి... నీట్‌లోనూ ర్యాంకు పొంది సిద్దిపేటలోని సురభి వైద్య కాలేజీలో ఎంబీబీఎస్‌ సీటు పొందింది. శ్రావణి ఇంటర్‌లో 97 శాతంతో ఉత్తీర్ణత సాధించి ఏపీలోని ఎన్‌ఐటీ తాడేెపల్లిగూడెంలో బీటెక్‌ సీటు సంపాదించింది. ఇద్దరికీ ఉచిత సీట్లు వచ్చినా ట్యూషన్‌, హాస్టల్‌, మెస్‌ ఫీజులు చెల్లించలేక ఇబ్బంది పడుతున్నారు. ఈ విషయం ట్విటర్‌ ద్వారా తెలుసుకున్న మంత్రి కేటీఆర్‌ ఆదివారం ప్రగతిభవన్‌లో ఇద్దరికీ మొదటి సంవత్సరానికయ్యే మొత్తం చెల్లించేందుకు చెక్కు ఇచ్చారు. ఈ సందర్భంగా కావేరి, శ్రావణిలు కేటీఆర్‌కు కృతజ్ఞతలు తెలిపారు.