Telangana News: 3 కి.మీ. పైపులు వేసి.. రైతు భగీరథ ప్రయత్నం

శ్రీశైలం జలాశయంలో నీటి నిల్వ కనిష్ఠ స్థాయికి తగ్గడంతో 35 రోజుల కిందట కల్వకుర్తి ఎత్తిపోతల(కేఎల్‌ఐ) నుంచి సాగునీటి విడుదల నిలిపేశారు. దీంతో ఆయకట్టు రైతుల పరిస్థితి అగమ్యగోచరంగా మారింది. నీటితడి అందక ఎండుతున్న పంటలను బతికించుకునేందుకు భగీరథ ప్రయత్నాలే చేస్తున్నారు. నాగర్‌కర్నూల్‌ జిల్లా తిమ్మాజిపేట మండలం ఆవంచ గ్రామానికి చెందిన రైతు కర్నె రాములు కేఎల్‌ఐ కాలువ వెంట వివిధ ప్రాంతాల్లో 8 ఎకరాలు సాగు చేస్తున్నారు. వడ్డీకి రూ.3 లక్షల అప్పు తెచ్చి మిర్చి, మక్కలు, వరి పంటలు వేశారు. వాటిని కాపాడుకునేందుకు ఓ బోరును నెల రోజులకు రూ.15 వేలకు అద్దెకు తీసుకున్నారు. అక్కడి నుంచి తన పొలాలకు 20 అడుగుల పొడవున్న 140 పైపులు (2800 అడుగుల పొడవు) ఏర్పాటు చేసి నీటి తడులు అందిస్తున్నారు. ఇంతచేస్తున్నా వరి పంటకు నీరందక ఎండుముఖం పడుతోందని ఆవేదన వ్యక్తం చేస్తున్నారు. పంటలు చేతికి రావడానికి మరో నెల రోజుల సమయం పడుతుందని తెలిపారు. బోరు ఎండకుండా నీరు వస్తేనే పంటలు చేతికందే అవకాశం ఉంటుందని చెప్పారు.

- ఈనాడు, మహబూబ్‌నగర్‌