Weather Forecast: తెలంగాణలో నేడు, రేపు ఓ మోస్తరు వర్షాలు

ఈనాడు, హైదరాబాద్‌: మహారాష్ట్రలోని విదర్భ ప్రాంతంపై 1500 మీటర్ల ఎత్తున గాలులతో ఉపరితల ఆవర్తనం ఏర్పడింది. ఈ ఆవర్తనం నుంచి కర్ణాటక వరకు గాలుల్లో అస్థిరత కారణంగా ఉపరితలద్రోణి ఏర్పడింది. వీటి ప్రభావంతో ఆది, సోమవారాల్లో తెలంగాణలో అక్కడక్కడా ఉరుములు, మెరుపులతో ఓ మోస్తరు వర్షాలు కురిసే అవకాశాలున్నాయని వాతావరణ కేంద్రం తెలిపింది. ఆదివారం నుంచి 4 రోజుల పాటు ఉష్ణోగ్రతలు పెరిగి వడగాలులు వీస్తాయని వివరించింది. ప్రజలు మధ్యాహ్నం పూట ఎండలో బయట తిరగవద్దని సూచించింది. శనివారం రాష్ట్రంలోకెల్లా అత్యధికంగా జమ్మికుంట (కరీంనగర్‌ జిల్లా)లో 44.9 డిగ్రీల ఉష్ణోగ్రత నమోదైంది.