Telangana News: పసికందును సాకలేను.. పోలీసులను ఆశ్రయించిన తండ్రి

మానసిక స్థితి సరిగా లేని తల్లి

రెంజల్, న్యూస్‌టుడే: నిజామాబాద్‌ జిల్లా రెంజల్‌లో ఏడు రోజుల పసికందును పోషించలేనని శనివారం ఓ తండ్రి పోలీసులను ఆశ్రయించాడు. స్థానిక ఎస్సై సాయన్న, అంగన్‌వాడీ ఉపాధ్యాయురాలు సురేఖ కథనం ప్రకారం.. రెంజల్‌కు చెందిన రేణుకకు నీలా గ్రామానికి చెందిన నగేశ్‌తో ఏడాది క్రితం వివాహమైంది. వీరికి ఈ నెల 7న పాప జన్మించింది. రేణుకకు కొంతకాలంగా మానసిక స్థితి సరిగా లేదు. ఆరు నెలలుగా పుట్టింట్లోనే ఉంటోంది. రేణుక ఇంటికి వెళ్లిన ఆశా కార్యకర్తలు పాపకు సరిగా పాలు పట్టడంలేదని గుర్తించి భర్తకు సమాచారమందించారు. దీంతో ఆయన వచ్చి పాపను తీసుకెళ్లారు. ఆయన కుటుంబీకులు వారించడంతో పాపను తీసుకుని పోలీసుస్టేషన్‌కు వెళ్లి.. తాను సాకలేనని చెప్పాడు. దీంతో పోలీసులు శిశువును తిరిగి తల్లి చెంతకు చేర్చారు. పసికందును అటు నగేశ్, ఇటు రేణుక కుటుంబ సభ్యులు వద్దంటుండడంతో ఐసీడీఎస్‌ ఉన్నతాధికారులకు సమాచారం అందించినట్లు సురేఖ పేర్కొన్నారు. ప్రస్తుతం శిశువు తల్లి వద్దే ఉంది.