kinnera mogulaiah: పేదోడిని.. మట్టి కొట్టకండి: కిన్నెర మొగిలయ్య ఆవేదన

అచ్చంపేట, న్యూస్‌టుడే: నిరుపేదనైన తనను రాజకీయ వివాదాల్లోకి లాగి నష్టం కలిగించవద్దని 12 మెట్ల కిన్నెర వాద్య కళాకారుడు దర్శనం మొగిలయ్య ఆవేదనతో వేడుకున్నారు. రాష్ట్ర ప్రభుత్వం ప్రకటించిన ఇంటి స్థలంతో పాటు రూ. కోటి అందాయా అని ఇటీవల ఓ రాజకీయ పార్టీ నేత మొగిలయ్య వద్ద ప్రస్తావించారు. ఇంకా అందలేదని, ఎమ్మెల్యే గువ్వల బాల్‌రాజు ఇప్పించేందుకు కృషి చేస్తున్నారని మొగిలయ్య సమాధానమిచ్చారు. ఆ వీడియోను సామాజిక మాధ్యమాల్లో వైరల్‌ చేయడంతో మొగిలయ్య బుధవారం ఆ నాయకుడిని అచ్చంపేటలో రోడ్డుపైనే నిలదీశారు. అనంతరం విడుదల చేసిన మరో వీడియోలో మొగిలయ్య ఆవేదన వ్యక్తం చేశారు. తనకు రాష్ట్రప్రభుత్వం అండగా నిలిచిందని స్పష్టం చేశారు. ఓ పార్టీ నేతలు తనకు పద్మశ్రీ పురస్కారాన్ని కేంద్రం ఇచ్చిందంటున్నారని, అవసరమైతే దాన్ని వాపసు ఇచ్చేయడానికైనా సిద్ధమేనన్నారు. ‘మీ రాజకీయాల కోసం నా నోట్లో మట్టి కొట్టవద్దని’ ఆయన కోరారు.