విత్తు ధరలో సగమైనా పంటకు రాదాయె!

ధాన్యం మద్దతు ధర   రూ.1960 మాత్రమే 
కానీ క్వింటా విత్తనాలు రూ.4,400 

ఈనాడు, హైదరాబాద్‌: అన్నదాతలను విత్తన ధరలు భయపెడుతున్నాయి. వానాకాలం(ఖరీఫ్‌) సీజన్‌కు వచ్చేనెల మొదటివారం నుంచి విక్రయించే పలురకాల విత్తనాల రేట్లు భారీగా పెరుగుతున్నాయి. పత్తి తరవాత అరకోటి ఎకరాలకు పైగా సాగయ్యే వరి విత్తనాల గరిష్ఠ ధర క్వింటాకు రూ.4,400కి చేరింది. ఒక్కో బ్రాండును బట్టి రూ.3200 నుంచి 4400 రూపాయల వరకు రేట్లను కంపెనీలు నిర్ణయించాయి. ఏ గ్రేడ్‌ ధాన్యం ధర క్వింటాకు రూ.1960 ఇవ్వాలని కేంద్రం 2021 జూన్‌లో ప్రకటించింది. వరి క్వింటా విత్తనాల ధరలో కనీసం సగానికి సగమైనా రైతు పండించే ధాన్యానికి లేదు. విత్తన పంట సాగు ఖర్చులు బాగా పెరిగినందున ధరలు పెంచుతున్నట్లు ప్రైవేటు కంపెనీలు చెబుతున్నాయి. ఇంకా మొక్కజొన్న, సోయాచిక్కుడు వంటి పంటల విత్తనాల రేట్లు రైతులను బెంబేలెత్తిస్తున్నాయి. మొక్కజొన్న పంటలో మాధురి, బీపీసీహెచ్‌-6 అనే పేరుగల వంగడాలైతే క్వింటా ధర ఏకంగా రూ.40 వేలు పలుకుతోంది. వీటిని ఎకరానికి 8 కిలోలే వేస్తారని, రైతులపై భారం ఉండదని కంపెనీలు చెబుతున్నాయి. 

24న మేళాలు 

పరిశోధనల ద్వారా పండించిన నాణ్యమైన విత్తనాలను విక్రయించే ఆచార్య జయశంకర్‌ వ్యవసాయ విశ్వవిద్యాలయం తాజాగా ధరలు ఖరారు చేసింది. ఈ నెల 24న రాజేంద్రనగర్‌, జగిత్యాల జిల్లా పొలాస, పాలెం(నాగర్‌కర్నూల్‌ జిల్లా), తోర్నాల(సిద్దిపేట), నత్నాయిపల్లి, ఆదిలాబాద్‌, మల్యాల, తాండూరు, ముథోల్‌, వరంగల్‌ విశ్వవిద్యాలయ ప్రాంతీయ పరిశోధన కేంద్రాల్లో ఈ విత్తనాలను రైతులకు నేరుగా విక్రయించేందుకు ‘విత్తన మేళా’లు ఏర్పాటు చేస్తున్నట్లు వర్సిటీ వెల్లడించింది. 8 రకాల పంటలకు సంబంధించిన 44 రకాల మేలైన వంగడాలు 15 వేల క్వింటాళ్లను రైతులకు అమ్మనున్నట్లు జయశంకర్‌ ఉపకులపతి(వీసీ) ప్రవీణ్‌రావు చెప్పారు.