విప్లవాత్మక సంస్కరణలు అవసరం

 జీవశాస్త్రాల రంగంలో కేంద్రం మద్దతు లేదు

తెలంగాణలో అద్భుత ప్రగతి

దావోస్‌ చర్చాగోష్ఠిలో మంత్రి కేటీఆర్‌

ఈనాడు, హైదరాబాద్‌: జీవశాస్త్రాల రంగంలో ప్రపంచ పోటీ తట్టుకోవాలంటే భారతదేశంలో విప్లవాత్మకమైన సంస్కరణలు అవసరమని రాష్ట్ర పరిశ్రమలు, ఐటీ శాఖల మంత్రి కేటీఆర్‌ తెలిపారు.ఈ రంగానికి ఊతమిచ్చే విధానాలకు భారత ప్రభుత్వం నుంచి సరైన మద్దతు లేదన్నారు. దావోస్‌లో జరుగుతున్న ప్రపంచ ఆర్థిక వేదిక సదస్సులో జీవశాస్త్రాల రంగంపై సోమవారం జరిగిన చర్చాగోష్ఠిలో ఆయన  ప్రసంగించారు.‘‘ఔషధరంగంలో పెట్టుబడులు ప్రమాదంతో కూడుకున్నవి. వాటిని అధిగమించేందుకు వీలుగా సులభతర విధానాలుండాలి. రాష్ట్ర ప్రభుత్వ విధానాల వల్ల ఈ రంగంలో అద్భుత ప్రగతి సాధిస్తున్నాం. కేంద్రం కూడా వీటిని ఆచరిస్తే సత్ఫలితాలు వస్తాయి. ప్రపంచంలోనే అతిపెద్ద ఔషధ సమూహమైన హైదరాబాద్‌ ఔషధనగరిని అత్యున్నత ప్రమాణాలతో నిర్మిస్తున్నాం. ఈ ప్రాజెక్టుకు కేంద్రం మద్దతు లేదు. కరోనా వల్ల అందరికీ ముప్పు ఏర్పడింది. కానీ.. జీవశాస్త్రాలు, వైద్యరంగానికి ప్రాధాన్యం పెరిగింది. తెలంగాణ దీనిని అందిపుచ్చుకుంది. జీవశాస్త్రాల రాజధానిగా హైదరాబాద్‌ ఎదిగింది. ఔషధరంగ బలోపేతానికి కేంద్ర ప్రభుత్వం మరింత చొరవగా ముందుకు కదలాలి. ఈ దిశగా ప్రధానమంత్రి నరేంద్రమోదీ దృష్టి సారించాలి. ప్రపంచవ్యాప్తంగా పారిశ్రామికవేత్తలను మా రాష్ట్రానికి ఆహ్వానిస్తూ ఎర్రతివాచీ పరుస్తున్నాం’’ అని కేటీఆర్‌ తెలిపారు. ఈ చర్చాగోష్ఠిలో డాక్టర్‌ రెడ్డీస్‌ ప్రతినిధి జీవీ ప్రసాద్‌, పీడబ్ల్యూసీకి చెందిన మహ్మద్‌అథర్‌ పాల్గొన్నారు.