అవినీతిపై ఆప్‌ తరహాలో పోరాడండి

కేసీఆర్‌కు ఎఫ్‌జీజీ లేఖ

ఈనాడు, హైదరాబాద్‌: అవినీతిపై తెలంగాణలోనూ ఆప్‌ తరహాలో పోరాటం చేయాలని సుపరిపాలన వేదిక(ఎఫ్‌జీజీ) కార్యదర్శి పద్మనాభరెడ్డి బుధవారం ముఖ్యమంత్రి కేసీఆర్‌కు రాసిన లేఖలో కోరారు. దిల్లీ, పంజాబ్‌లో పర్యటించిన కేసీఆర్‌ ఆయా రాష్ట్రాల్లో అమలవుతున్న కార్యక్రమాలు దేశానికి ఆదర్శమని కొనియాడారని ఆ లేఖలో పద్మనాభరెడ్డి గుర్తు చేశారు. ‘‘దిల్లీలో విద్యావ్యవస్థ గురించి తెలుసుకునేందుకు తెలంగాణ నుంచి కొందరు ఉపాధ్యాయులను దిల్లీకి పంపుతామని కేసీఆర్‌ చెప్పారు. ఇదే స్ఫూర్తిని అవినీతిపై పోరులోనూ కొనసాగించాలి. కాంట్రాక్టుల్లో కమీషన్లు అడిగారని పంజాబ్‌లో ఆప్‌ ప్రభుత్వం ఆ రాష్ట్ర ఆరోగ్య మంత్రిని పదవి నుంచి తొలగించింది. తెలంగాణలో ప్రభుత్వ పనుల్లో ఎక్కువ మొత్తంలో కమీషన్లు తీసుకొంటున్నారని విమర్శలు వస్తున్నాయి. దీన్ని దృష్టిలో ఉంచుకుని ఇక్కడ కొనసాగుతున్న అవినీతిపై ఉక్కుపాదం మోపాలి’’ అని లేఖలో సీఎం కేసీఆర్‌ను కోరారు.