సిరులు కురిపిస్తున్న కాళేశ్వరం ఇసుక

అయిదేళ్లలో రూ.1911.74 కోట్ల ఆదాయం

ఈనాడు డిజిటల్‌, జయశంకర్‌ భూపాలపల్లి, కాళేశ్వరం, న్యూస్‌టుడే: ఇసుక విక్రయాల ద్వారా ప్రభుత్వ ఖజనాకు కాసుల పంట పండుతోంది. జయశంకర్‌ భూపాలపల్లి జిల్లా పరిధిలోని గోదావరి పరీవాహక ప్రాంతంలో ఏర్పాటు చేసిన ఇసుక రీచుల ద్వారా భారీగా ఆదాయం సమకూరుతోంది. రాష్ట్రం నలుమూలలకు ఇక్కడి నుంచే ఇసుకను తరలిస్తున్నారు. కాళేశ్వరం ప్రాజెక్టు నిర్మాణంలో భాగంగా గోదావరి నదిపై మేడిగడ్డ (లక్ష్మి), అన్నారం (సరస్వతి) బ్యారేజీలను నిర్మించారు. వీటి ముంపు ప్రాంతాలైన మహదేవ్‌పూర్‌, కాటారం మండలాల్లోని గోదావరి పరీవాహక ప్రాంతాల్లో ప్రభుత్వం ఇసుక రీచులను ఏర్పాటు చేసింది. ప్రాజెక్టు బ్యారేజీల నిర్మాణాలకు కసరత్తు చేస్తున్నప్పుడే వాటి పరిధిలోని ఇసుక తవ్వకాలకు అనుమతులు ఇచ్చింది.

సర్కారు రూ.600 క్యూబిక్‌ మీటర్‌ చొప్పన ఇసుక విక్రయాలు జరుపుతోంది. ముందుగా టీఎస్‌ఎండీసీ వైబ్‌సైట్‌లో రీచుల వారీగా అందుబాటులో ఉన్న ఇసుక వివరాలను ఆన్‌లైన్‌లో ఉంచుతుంది. స్లాట్‌ బుకింగ్‌ ఆధారంగా సంబంధిత రీచ్‌లో లారీని లోడ్‌ చేస్తారు. ఇలా ఇసుక విక్రయాల ద్వారా అయిదేళ్లలో రూ.1911.74 కోట్ల ఆదాయం సమకూరినట్లు టీఎస్‌ఎండీసీ అధికారులు తెలిపారు. బ్యారేజీల వెనక జలాలతో గోదావరిలో నీటి మట్టాలు ఎక్కువగా ఉండటంతో ఇసుక నిల్వలు తగ్గాయి. దీంతో ఇక్కడి రీచులు ఒక్కొక్కటిగా తగ్గడంతో కొత్త రీచుల కోసం అన్వేషిస్తున్నారు. జిల్లాకు 38 ఇసుక రీచులు కేటాయించగా ప్రస్తుతం 5 కొనసాగుతున్నాయి.