తెలుగు రాష్ట్రాల గవర్నర్ల భేటీ

ఈనాడు, అమరావతి: ఆంధ్రప్రదేశ్‌ గవర్నర్‌ బిశ్వభూషణ్‌ హరిచందన్‌ దంపతులను శుక్రవారం తెలంగాణ గవర్నర్‌ తమిళిసై మర్యాదపూర్వకంగా కలిశారు. హైదరాబాద్‌ అంతర్జాతీయ విమానాశ్రయంలో ఈ భేటీ జరిగింది. రెండు తెలుగు రాష్ట్రాల గవర్నర్లు అనేక అంశాలపై చర్చించుకున్నారు. బిశ్వభూషణ్‌ హరిచందన్‌ దంపతులు భువనేశ్వర్‌లో తితిదే కొత్తగా నిర్మించిన శ్రీవారి ఆలయ మహా సంప్రోక్షణ కార్యక్రమానికి హాజరై, తిరిగి విజయవాడ వెళ్తూ హైదరాబాద్‌ విమానాశ్రయంలో కొద్దిసేపు ఆగారు. ఈ సందర్భంగా తమిళిసై కలిసి మాట్లాడారు. గవర్నర్‌ దంపతులను శాలువాతో సత్కరించారు.