మూడు రోజుల్లో కేరళకు ‘నైరుతి’

ఈనాడు, హైదరాబాద్‌: నైరుతి రుతుపవనాలు రెండు, మూడు రోజుల్లో కేరళలో ప్రవేశించడానికి అనుకూల వాతావరణం ఏర్పడినట్లు వాతావరణ శాఖ రాష్ట్ర సంచాలకురాలు నాగరత్న తెలిపారు. కేరళకు వచ్చిన వారం, పది రోజుల్లో తెలంగాణలోకి వస్తాయి. శుక్రవారం నాటికి అరేబియా సముద్రంలోని దక్షిణ ప్రాంతం, మాల్దీవులు, లక్షదీవుల వరకూ రుతుపవనాలు విస్తరించాయి. పశ్చిమ గాలులు తక్కువ ఎత్తులో వీస్తున్నందున రుతుపవనాలు మరింత వేగంగా ముందుకు రావడానికి అనుకూల వాతావరణం ఉంది. శని, ఆదివారాల్లో తెలంగాణలో ఓ మోస్తరు వర్షాలు కురిసే అవకాశాలున్నాయి. సిరిసిల్ల జిల్లా ఎల్లారెడ్డిపేట మండలం వెంకటాపూర్‌కి చెందిన పడిగె లత(40), పెద్దపల్లి జిల్లా అంతర్గాం మండలం మూర్ముర్‌కు చెందిన నువ్వుల గట్టమ్మ(60) అనే ఉపాధి హామీ కూలీలు శుక్రవారం పనులు చేస్తుండగా వడదెబ్బతో మృతిచెందారు.