పీహెచ్‌సీల్లో మొదలైన ఆరోగ్యశ్రీ సేవలు

సాధారణ ప్రసవానికి త్వరలో రూ.3 వేల ప్రోత్సాహం

రాష్ట్ర వైద్య ఆరోగ్యశాఖ సంచాలకుడు శ్రీనివాసరావు వెల్లడి

వికారాబాద్‌ కలెక్టరేట్‌, న్యూస్‌టుడే: రాష్ట్ర వ్యాప్తంగా ప్రాథమిక ఆరోగ్య కేంద్రాల్లో శుక్రవారం నుంచి ఆరోగ్యశ్రీ సేవలు ఆరంభమయ్యాయని రాష్ట్ర వైద్య ఆరోగ్య శాఖ సంచాలకుడు శ్రీనివాసరావు తెలిపారు. వికారాబాద్‌ జిల్లా మద్గుల్‌ చిట్టెంపల్లిలోని జిల్లా పంచాయతీ వనరుల కేంద్రంలో వైద్య సేవలపై శుక్రవారం ఆయన సమీక్ష నిర్వహించారు. అనంతరం విలేకరులతో మాట్లాడుతూ.. ఆరోగ్యశ్రీ పథకం కింద రోగికి 53 రకాల వైద్య సేవలు అందుతాయన్నారు. ఉచితంగా పరీక్షలు, మందుల పంపిణీ, వ్యాధినిర్ధారణ పరీక్షలు చేస్తారన్నారు. సాధారణ ప్రసవాలు జరిపితే డాక్టర్‌కు ప్రోత్సాహకంగా రూ.3 వేలు చెల్లించాలని నిర్ణయించామని త్వరలో ఉత్తర్వులు జారీ చేస్తామని శ్రీనివాసరావు పేర్కొన్నారు. ప్రాథమిక ఆరోగ్య కేంద్రాల పరిధిలో ఉన్న ఆసుపత్రులను పల్లె దవాఖానాలుగా మార్చి మెరుగైన వైద్య సేవలను అందించటానికి చర్యలు తీసుకుంటున్నామని, ప్రతి పల్లె దవాఖానాలో ఎంబీబీఎస్‌ డాక్టరును నియమిస్తామని తెలిపారు. ఒక్కో ప్రాథమిక ఆరోగ్య కేంద్రంలో మూడు సీసీ కెమెరాలను ఏర్పాటు చేస్తామని వాటిని కేంద్ర కార్యాలయానికి అనుసంధానం చేస్తామని శ్రీనివాసరావు వెల్లడించారు. వైద్యాధికారులు, వైద్యుల వాహనాలకు జీపీఎస్‌ను పెట్టిస్తామని తెలిపారు. 

వైద్యఆరోగ్య శాఖకు నిధుల మంజూరు

ఈనాడు, హైదరాబాద్‌: రాష్ట్రంలో బోధనాసుపత్రుల ఏర్పాటు, ఆయుష్మాన్‌ భారత్‌ కార్యక్రమం, ఆసుపత్రులు, వైద్య కళాశాలల నిర్వహణ కోసం ప్రభుత్వం రూ.282 కోట్లు విడుదల చేసింది. ఈ మేరకు వైద్యఆరోగ్యశాఖ కార్యదర్శి రిజ్వీ ఉత్తర్వులు జారీచేశారు. ఉద్యోగులు, పింఛనుదారులు, జర్నలిస్టుల ఆరోగ్య పథకం, ఆరోగ్యశ్రీ ట్రస్టుకు రూ.253 కోట్లు మంజూరు చేశారు.