సన్నాలు వేసినా నష్టాలు తప్పలేదు

నల్గొండ జిల్లాలో పంటకు నిప్పుపెట్టిన రైతు

నిడమనూరు, న్యూస్‌టుడే: వేసవిలో దొడ్డు రకం వరి వేయొద్దని ప్రభుత్వం చెప్పడంతో నల్గొండ జిల్లా నిడమనూరు మండలం ముప్పారంలో రైతులు సన్నరకానికి మొగ్గు చూపారు. సుమారు 15 రోజులు ఆలస్యంగా నాట్లేసిన పొలాలు తెగుళ్ల బారిన పడటంతో దిగుబడి పూర్తిగా తగ్గింది. ధాన్యానికి వచ్చే సొమ్ము కోతల ఖర్చులకూ సరిపోని పరిస్థితి. కంచి శ్రీను రెండెకరాల సొంత పొలంతో పాటు మరో నాలుగు ఎకరాలు కౌలుకు తీసుకొని హెచ్‌ఎంటీ, చింట్లు, చిట్టిపొట్లు రకాలు వేశారు. నాలుగు ఎకరాల్లో వేసిన హెచ్‌ఎంటీ 100 బస్తాలే దిగుబడి వచ్చింది. రెండు ఎకరాల్లో వేసిన మిగిలిన రకాలను కోస్తే 10 బస్తాలూ వచ్చే పరిస్థితి లేక శనివారం పంటకు నిప్పుపెట్టారు. గ్రామంలో 50 ఎకరాల్లో పంటను కోయకుండానే వదిలేశారు. తెల్కపల్లి కోటేశ్‌ అనే కౌలు రైతు 14 ఎకరాల్లో సన్నాలు వేశారు. రెండెకరాలు కోస్తే 10 బస్తాలే వచ్చింది. సాగుకు రూ.4.5 లక్షలు ఖర్చయిందని.. అందులో 10 శాతమూ రాలేదని వాపోయారు.