దక్షిణ డిస్కంలో నిర్మాణ ధరల పెంపు

ఈనాడు, హైదరాబాద్‌: దక్షిణ తెలంగాణ విద్యుత్‌ పంపిణీ సంస్థ(టీఎస్‌ఎస్పీడీసీఎల్‌) చేపడుతున్న నిర్మాణాలకు చెల్లించే ‘స్టాండర్డ్‌ షెడ్యూల్‌ రేటు’(ఎస్‌ఎస్‌ఆర్‌)ను 25 నుంచి 30 శాతం వరకూ పెంచుతున్నట్లు సంస్థ శనివారం ప్రకటించింది. విద్యుత్‌ శాఖ మంత్రి జగదీశ్‌రెడ్డి సూచనలతో డిస్కం సీఎండీ రఘుమారెడ్డి ఈ పెంపుపై తెలంగాణ గుత్తేదారుల సంఘం నేతలతో ఇటీవల చర్చలు జరిపారు. అనంతరం అసోసియేషన్‌ డిమాండ్ల పరిశీలన నిమిత్తం ఎనిమిది మందితో వేసిన కమిటీ ఇచ్చిన తుది నివేదికను అనుసరించి ధరలను పెంచినట్టు సంస్థ తెలిపింది. ఆ మేరకు పట్టణ ప్రాంతాల్లో 30%, గ్రామీణ ప్రాంతాలలో 25% పెంచుతూ ఉత్తర్వులు జారీ చేసినట్టు వెల్లడించింది.