సరెండర్‌ లీవ్‌లు ఇప్పించండి

డీజీపీతో సమావేశంలో పోలీసు అధికారుల సంఘం

ఈనాడు, హైదరాబాద్‌: పెండింగ్‌లో ఉన్న మూడు సరెండర్‌ లీవ్‌లతోపాటు టీఏలకు సంబంధించిన డబ్బులను ఇప్పించాలని తెలంగాణ రాష్ట్ర పోలీసు అధికారుల సంఘం అధ్యక్షుడు గోపిరెడ్డి, ప్రతినిధులు శ్రీనివాసరెడ్డి, శంకర్‌రెడ్డి, షకీల్‌, వెంకటేశ్వర్లు తదితరులు డీజీపీ ఎం.మహేందర్‌రెడ్డిని కోరారు. శనివారం డీజీపీ కార్యాలయంలో నిర్వహించిన సమావేశంలో సంఘం ప్రతినిధులు పలు సమస్యలపై డీజీపీకి వినతిపత్రం అందించారు. శిక్షణ పూర్తయిన ఏఎస్‌ఐలకు ఎస్‌ఐలుగా పదోన్నతులు కల్పించాలని, ర్యాంకర్‌ ఎస్‌ఐ పదోన్నతుల కోటాను 30 నుంచి 50 శాతానికి పెంచాలని కోరారు. కానిస్టేబుళ్లు పదవీ విరమణ నాటికి ఎస్‌ఐలు అయ్యేలా సంస్కరణలు చేపట్టాలని, వివిధ అలవెన్సులకు సంబంధించిన జీవోలను జారీ చేయాలని వారు డీజీపీ దృష్టికి తీసుకెళ్లారు. ఈ సమావేశంలో అదనపు డీజీపీలు శివధర్‌రెడ్డి, విజయ్‌కుమార్‌, నాగిరెడ్డి, ఐజీ కమలాసన్‌రెడ్డి పాల్గొన్నారు.