కుమురంభీం జలాశయం రెండు గేట్ల ఎత్తివేత

ఆసిఫాబాద్‌, న్యూస్‌టుడే: కుమురంభీం జిల్లాలో రెండు రోజులుగా భారీ వర్షాలు కురుస్తున్నాయి. దీంతో ఆసిఫాబాద్‌ మండలంలోని కుమురంభీం జలాశయంలోకి వరదనీరు పోటెత్తడంతో శనివారం సాయంత్రం రెండు గేట్లు ఎత్తి నీటిని దిగువకు వదిలారు. ప్రాజెక్టు పూర్తిస్థాయి నీటిమట్టం 243 మీటర్లు కాగా ఎగువన కురుస్తున్న వర్షంతో భారీగా వరద నీరు వచ్చి చేరుతోంది. శనివారం సాయంత్రం ప్రాజెక్టు నీటిమట్టం 241.50 మీటర్లకు చేరడంతో 5, 6 గేట్లను ఒక మీటరు పైకెత్తి 5,500 క్యూసెక్కుల నీటిని వదిలారు. ఇదే జిల్లాలోని వట్టివాగుకు వరద పోటెత్తడంతో 2, 3 నంబరు గేట్లు ఎత్తి 1,445 క్యూసెక్కులు వదిలారు. పరీవాహక ప్రాంత ప్రజలు అప్రమత్తంగా ఉండాలని అధికారులు సూచించారు.