యాదాద్రికి ఒక్కరోజే 70 వేల మంది భక్తులు!

యాదగిరిగుట్ట పట్టణం, న్యూస్‌టుడే: యాదాద్రి శ్రీలక్ష్మీనర్సింహస్వామి దేవస్థానానికి ఆదివారం భక్తులు పోటెత్తారు. సుమారు 70 వేల మంది భక్తులు క్షేత్రాన్ని దర్శించుకున్నట్లు అధికారుల అంచనా. ధర్మదర్శనానికి నాలుగు గంటల సమయం పట్టిందని భక్తులు తెలిపారు. దర్శన నిరీక్షణ, క్యూలైన్లలో పంకాలు లేవని, మంచినీటి వసతులు కల్పించలేదని వాపోయారు. ఇటీవల కురుస్తున్న వర్షాలతో క్యూ కాంప్లెక్స్‌ భవనంపై నీరు నిలిచి స్లాబు నుంచి కారుతోంది. ఆలయ పరిసరాలు తడవకుండా దేవస్థాన సిబ్బంది బకెట్‌, స్పాంజీని ఏర్పాటు చేశారు. ప్రసాద విక్రయ కేంద్రం వద్ద కూడా ఇలాగే సమస్య నెలకొంది.