పీవీ స్ఫూర్తితో పురోగమనం: సీఎం

ఈనాడు, హైదరాబాద్‌: తెలంగాణ నాయకత్వ దార్శనికత దేశానికి దిక్సూచిగా నిలుస్తుందని నిరూపించిన మాజీ ప్రధాని పీవీ నరసింహారావు స్ఫూర్తితో రాష్ట్ర ప్రభుత్వం ముందుకు సాగుతోందని, తమ కార్యాచరణలోనే అది ఇమిడి ఉందని సీఎం కేసీఆర్‌ తెలిపారు. మంగళవారం పీవీ జయంతిని పురస్కరించుకొని ఆయనకు సీఎం నివాళులర్పించారు. ‘‘క్లిష్ట సమయాల్లో ఆర్థిక సంస్కరణలు ప్రవేశపెట్టి దేశాన్ని కాపాడిన ఆధునిక భారతదేశ నిర్మాత, తెలంగాణ ముద్దుబిడ్డ పీవీ. ప్రధానిగా ఆయన చేపట్టిన విధానాలతో దేశం అన్ని రంగాల్లో పురోగమించింది. ఆయన బాటలోనే పయనిస్తూ రాష్ట్ర ప్రభుత్వం పలు అభివృద్ధి, సంక్షేమ పథకాలు అమలు చేస్తూ దేశానికి ఆదర్శంగా నిలిచింది’’ అని సీఎం పేర్కొన్నారు.