ఏకరూప దుస్తుల రంగు మార్పు

ఈనాడు, హైదరాబాద్‌: కొత్త విద్యాసంవత్సరం(2022-23)లో ప్రభుత్వ పాఠశాలల విద్యార్థులకు సరఫరా చేయనున్న ఏకరూప దుస్తుల రంగు, డిజైన్‌ మారింది. గతంలో నీలం రంగు చొక్కా, సిరా రంగు నిక్కరు అందజేసేవారు. ఈ విద్యాసంవత్సరం తెల్ల వస్త్రంపై ఎరువు గడులతో కూడిన చొక్కాలు, కాఫీ రంగు నిక్కరు ఇవ్వనున్నారు. ఆగస్టు 15వ తేదీ నాటికి రెండు జతల యూనిఫాంకు అవసరమైన 1.40 కోట్ల మీటర్ల వస్త్రాన్ని సరఫరా చేస్తామని తెలంగాణ రాష్ట్ర చేనేత సహకార సంస్థ(టెస్కో) ఇటీవల విద్యాశాఖకు తెలిపింది. మొదటి విడతలో.. ఒక జత ఇచ్చేందుకు అవసరమైన వస్త్రం కొన్ని జిల్లాల్లోని మండల కేంద్రాలకు చేరుకుంది.