అల్లూరి జయంతి వేడుకల్లో పాల్గొనండి

 4న భీమవరం రావాలని చిరంజీవికి కేంద్రమంత్రి కిషన్‌రెడ్డి ఆహ్వానం

ఈనాడు, హైదరాబాద్‌: పశ్చిమగోదావరి జిల్లా భీమవరంలో జులై 4న నిర్వహించే అల్లూరి సీతారామరాజు జయంతి వేడుకల్లో పాల్గొనాలని ప్రముఖ సినీనటుడు చిరంజీవిని కేంద్ర పర్యాటక, సాంస్కృతిక శాఖ మంత్రి జి.కిషన్‌రెడ్డి ఆహ్వానించారు. ఈ మేరకు మంగళవారం ఆయన లేఖ రాశారు. 4న భీమవరంలో జరిగే కార్యక్రమం, సభలో ప్రధానమంత్రి నరేంద్ర మోదీ పాల్గొంటారని, అల్లూరి విగ్రహాన్ని ఆవిష్కరిస్తారని చిరంజీవికి రాసిన లేఖలో కిషన్‌రెడ్డి పేర్కొన్నారు. అల్లూరి సీతారామరాజుకు గౌరవసూచకంగా 2023 జులై 4 వరకు రాష్ట్ర ప్రభుత్వంతో కలిసి కేంద్రం వివిధ కార్యక్రమాల్ని నిర్వహించనున్నట్లు వివరించారు. అవి విజయవంతమయ్యేలా సహకారం అందించాలని కోరారు. లేఖలో కిషన్‌రెడ్డి కేంద్ర పర్యాటకశాఖ మాజీ మంత్రిగా చిరంజీవిని ప్రస్తావించారు.

కృష్ణంరాజు, కృష్ణలకు కూడా...

భీమవరం పట్టణం, న్యూస్‌టుడే: అల్లూరి సీతారామరాజు 125వ జయంతి ఉత్సవాలకు రెబల్‌స్టార్‌ కృష్ణంరాజు, సూపర్‌స్టార్‌ కృష్ణలను కూడా నిర్వాహకులు ఆహ్వానించినట్లు తెలిసింది. సీతారామరాజు జీవితచరిత్రపై తీసిన సినిమాలో నటించిన సూపర్‌స్టార్‌ కృష్ణను భీమవరం తీసుకొచ్చే ఏర్పాట్లలో ఉన్నట్లు సమాచారం. ఉత్సవ కమిటీకి గౌరవాధ్యక్షునిగా కృష్ణను నియమించారు.