‘వానాకాలం వెళ్లే వరకూ పదోన్నతులు అడగొద్దు’

ఈనాడు, హైదరాబాద్‌: వానాకాలం ముగిసే వరకూ నీటిపారుదల శాఖకు చెందిన ఏఈలు, ఏఈఈలు పదోన్నతులు, బదిలీలంటూ హైదరాబాద్‌లోని నీటిపారుదల శాఖ కార్యాలయానికి రావద్దని నీటిపారుదల శాఖ ఉత్తర్వులు జారీచేసింది. ఈ మేరకు ఈఎన్‌సీ(పరిపాలన) అనిల్‌కుమార్‌ శాఖ అంతర్గత ఉత్తర్వులు (ఆర్‌సీ/ఈఎన్‌సీ/బీ1) జారీ చేశారు. ఇటీవల కొందరు ఏఈ, ఏఈఈలు పదోన్నతులంటూ తరచూ కార్యాలయానికి వస్తున్నారని, పలువురు ఏఈఈలు మధ్యాహ్న భోజన సమయంలో ధర్నాకు అనుమతి కూడా కోరారని పేర్కొన్నారు. కృష్ణా, గోదావరి నదులపై ఉన్న ఆనకట్టలతో పాటు మధ్యతరహా ప్రాజెక్టుల డ్యాంల పరిరక్షణకు తగిన చర్యలు చేపట్టాలని నీటిపారుదలశాఖ ఆదేశించింది. ఇటీవల కేంద్ర ఉత్తర్వుల మేరకు కొత్తగా అమల్లోకి వచ్చిన ఆనకట్టల పరిరక్షణ కమిటీ, చట్టం అమలుపై ప్రత్యేక ప్రధాన కార్యదర్శి రజత్‌కుమార్‌ మంగళవారం సీఈలతో వీడియో కాన్ఫ్‌రెన్స్‌ ద్వారా మాట్లాడి పలు సూచనలు చేశారు.