ఎసైన్డ్‌దారులకే భూముల అప్పగింత..!

జమునా హేచరీస్‌ ఆక్రమణలో 85.19 ఎకరాలు

రెవెన్యూ యంత్రాంగం విచారణలో నిర్ధారణ

65 మందికి తిరిగి అప్పగించేందుకు కార్యాచరణ

ఈనాడు, హైదరాబాద్‌: మెదక్‌ జిల్లా మాసాయిపేట మండలంలోని అచ్చంపేట, హకీంపేటలలోని వివాదాస్పద ఎసైన్డ్‌ భూముల వ్యవహారం కీలక మలుపు తిరిగింది. మాజీ మంత్రి ఈటల రాజేందర్‌తోపాటు ఆయన అనుచరులు ఈ ఎసైన్డ్‌ భూములను ఆక్రమించుకొన్నారనే ఆరోపణల నేపథ్యంలో రెవెన్యూ అధికారులు కొంతకాలంగా విచారణ చేస్తున్న సంగతి తెలిసిందే. తాజాగా ఈ విచారణ కొలిక్కి వచ్చినట్లు తెలిసింది. విశ్వసనీయ వర్గాల సమాచారం ప్రకారం.. ఆ భూములను తిరిగి ఎసైన్డ్‌దారులకే ఇచ్చేందుకు రెవెన్యూ యంత్రాంగం సమాయత్తమవుతోంది. తెలంగాణ ఎసైన్డ్‌ భూముల(బదలాయింపు నిషేధం) చట్టం 1977 కింద విచారణ జరిపిన రెవెన్యూ అధికారులు ఈ నిర్ణయం తీసుకున్నారు. రెండు గ్రామాల్లోని 65 మంది ఎసైన్డ్‌దారులకు లేదా వారి వారసులకు ఈ భూములపై హక్కులు కల్పించేలా ప్రణాళిక రూపొందిస్తున్నారు. 

ఇంతకీ వివాదం ఏమిటంటే..: తమ భూములు ఆక్రమణకు గురయ్యాయని లింగయ్యతోపాటు మరికొందరు ప్రభుత్వానికి ఫిర్యాదు చేశారు. 1994లో తమకు ప్రభుత్వం కేటాయించిన సీలింగ్‌ భూముల్ని ఈటల రాజేందర్‌తోపాటు ఆయన అనుచరులు దౌర్జన్యంగా ఆక్రమించారనేది ఫిర్యాదు సారాంశం. ఆ భూముల్లో జమునా హేచరీస్‌కు చెందిన పౌల్ట్రీ షెడ్లు నిర్మించారని ఫిర్యాదులో పేర్కొన్నారు. ఈ ఫిర్యాదుపై రెవెన్యూ అధికారులు విచారణకు సిద్ధమవగా జమునా హేచరీస్‌ యాజమాన్యం హైకోర్టులో రిట్‌ పిటిషన్లు దాఖలు చేసింది. యంత్రాంగం నిబంధనల ప్రకారం చర్యలు తీసుకోవచ్చని హైకోర్టు ఆదేశిస్తూ ఆ పిటిషన్లను నిలుపుదల చేసింది. ఆ వివాదంపై రెవెన్యూ అధికారులు విచారణ జరిపారు.

రెండు గ్రామాల్లోని 65 మంది ఎసైన్డ్‌దారులకు చెందిన 85 ఎకరాల 19 గుంటల భూమి ఆక్రమణకు గురైనట్లు అధికారులు నిర్ధారణకు వచ్చారు. ఈ భూముల్ని నిషేధిత ఆస్తుల జాబితాలో చేర్చుతూ 2007 డిసెంబరు 17నే అప్పటి ప్రభుత్వం మెమో జారీ చేసినట్లు గుర్తించారు. మరోవైపు అప్పటి ఎసైన్డ్‌దారుల్లో 53 మంది బీసీలు, 9 మంది ఎస్సీలు, ముగ్గురు ఎస్టీలున్నట్లు వెల్లడైంది. ఈక్రమంలో వీరికే భూముల్ని తిరిగి అప్పగించాలని నిర్ణయించారు.