మిల్లర్లతో మిలాఖత్‌

ఇష్టారాజ్యంగా బియ్యం సేకరణ
15 మందికిపైగా పౌరసరఫరాల సంస్థ డీఎంలకు నోటీసులు!

ఈనాడు, హైదరాబాద్‌: నిర్దేశించిన లక్ష్యాలను తోసిరాజని అధికారులు మిల్లర్ల నుంచి వేల మెట్రిక్‌ టన్నుల బియ్యం తీసుకుని ప్రభుత్వంపై అదనపు భారం మోపారు. నిబంధనలకు నీళ్లొదిలిన పౌరసరఫరాల సంస్థ జిల్లా మేనేజర్లకు(డీఎంలకు) ఉన్నతాధికారులు నోటీసులు జారీ చేసేందుకు రంగం సిద్ధం చేశారు. ఇప్పటికే ఏడాదిన్నరకుపైగా సరిపోయే బియ్యం పౌరసరఫరాల సంస్థ వద్ద ఉన్నాయి. బియ్యం ఎక్కువ నిల్వ చేస్తే పురుగులు పడతాయి. రాష్ట్రంలో నెలకు 1.81 లక్షల మెట్రిక్‌ టన్నుల బియ్యం రేషన్‌ కార్డుదారులకు పంపిణీ చేయాలి. అందులో 1.08 లక్షల మెట్రిక్‌ టన్నులు కేంద్రం, మిగిలిన 73 వేలు రాష్ట్రం భరించాలి. ఇందుకోసం ఒక్క హైదరాబాద్‌ మినహా అన్ని జిల్లాల్లో కార్డుల సంఖ్య ఆధారంగా బియ్యం సేకరణ లక్ష్యాన్ని పౌరసరఫరాల సంస్థ ఆయా జిల్లా మేనేజర్లకు నిర్దేశిస్తుంది.

90 వేల మెట్రిక్‌ టన్నులు అదనంగా

గడిచిన రెండేళ్ల వ్యవధిలో నిర్ధారిత లక్ష్యం కన్నా సుమారు 90 వేల మెట్రిక్‌ టన్నుల బియ్యాన్ని 15 నుంచి 17 జిల్లాలకు చెందిన మేనేజర్లు సేకరించినట్లు అధికారులు గుర్తించారు. కేంద్రానికి నివేదికలు పంపే క్రమంలో పలు జిల్లాల్లో సేకరించిన బియ్యానికి, లక్ష్యాలకు మధ్య పొంతన లేకపోవడం  పౌరసరఫరాల భవన్‌ అధికారుల దృష్టికి వచ్చింది. రైతుల నుంచి ప్రభుత్వం ధాన్యాన్ని కొనుగోలు చేసి కస్టం మిల్లింగ్‌ విధానంలో బియ్యంగా మార్చేందుకు మిల్లర్లకు అప్పగిస్తుంది. కానీ పలువురు అధికారులు, కొందరు మిల్లర్లు కుమ్మక్కై నిబంధనలకు విరుద్ధంగా అదనపు బియ్యాన్ని సేకరించటంతో రాష్ట్ర ప్రభుత్వ ఖజానాపై అదనపు భారం మోపినట్లు అయింది. ఆయా జిల్లాల అధికారులకు శాఖాపరంగా షోకాజ్‌ నోటీసులు జారీ చేయాలని ఉన్నతాధికారులు నిర్ణయించారు. ‘పెద్ద మొత్తంలో వ్యత్యాసం ఉన్న మాట వాస్తవమే’నని పౌరసరఫరాల శాఖ ఉన్నతాధికారి ఒకరు ‘ఈనాడు’తో చెప్పారు.