అదనపు వైద్యవిద్య సంచాలకులకూ 65 ఏళ్లకు పదవీ విరమణ

ఈనాడు, హైదరాబాద్‌: ప్రభుత్వ వైద్య కళాశాలల్లో ప్రధానాచార్యులు, బోధనాసుపత్రుల్లో సూపరింటెండెంట్లు, అదనపు వైద్య విద్య సంచాలకులుగా పనిచేస్తున్న ఉన్నతాధికారులందరికీ పదవీ విరమణ వయసును 65 ఏళ్లకు పెంచుతూ ప్రభుత్వం గురువారం ఉత్తర్వులు జారీ చేసింది. వైద్యవిద్యలో ఆచార్యులకు పదవీ విరమణ వయసును 65 ఏళ్లకు పెంచుతూ ప్రభుత్వం గతంలోనే నిర్ణయం తీసుకుంది. అయితే ప్రభుత్వ వైద్యకళాశాలలు, బోధనాసుపత్రుల్లో అత్యధిక సందర్భాల్లో ఆచార్యులే.. సూపరింటెండెంట్లుగా, ప్రధానాచార్యులుగా పనిచేస్తున్నారు. అందుకే ఆయా స్థానాల్లో సేవలందిస్తున్న వారికి కూడా 65 ఏళ్ల వరకూ పదవీ విరమణ వయసును పెంచాలని ప్రభుత్వం నిర్ణయించింది. ఈ మేరకు అవసరమైన చర్యలు తీసుకోవాలని వైద్యశాఖ కార్యదర్శి రిజ్వీ ఉత్తర్వుల్లో ఆదేశించారు.