అంతా మొక్కు‘బడి’

ఊడిన పెచ్చులు.. తప్పిన ప్రమాదం

పాఠశాలలు పునఃప్రారంభానికి ముందు హడావుడి చేసిన అధికారులు, ప్రజాప్రతినిధులు శిథిలావస్థకు చేరిన పాఠశాల పరిస్థితులు పట్టించుకోలేదనడానికి సంగారెడ్డి జిల్లా మునిపల్లి మండలం అంతారం గ్రామంలోని ఉన్నత పాఠశాలే నిదర్శనం. మంగళవారం ఉదయం విద్యార్థులంతా ప్రార్థన చేస్తున్న సమయంలో పదోతరగతి గదిలో పెద్ద శబ్దంతో సీలింగ్‌ నుంచి సిమెంట్‌ పెచ్చులు ఊడి బెంచీలపై పడ్డాయి. ఆ సమయంలో అక్కడ విద్యార్థులు ఎవరూ లేకపోవడంతో పెద్ద ప్రమాదం తప్పింది. ఈ పాఠశాలలోని ప్రతి గదిలోనూ ఇదే పరిస్థితి నెలకొందని, వర్షం వస్తుందంటే భయం గుప్పిట్లో బడిని కొనసాగించాల్సి వస్తుందని ఉపాధ్యాయులు ఆందోళన వ్యక్తం చేస్తున్నారు. అనేకసార్లు ప్రజాప్రతినిధులు, జిల్లా ఉన్నతాధికారులకు విన్నవించినా... పట్టించుకునే వారే లేరని విద్యార్థుల తల్లిదండ్రులు వాపోతున్నారు.

- న్యూస్‌టుడే, మునిపల్లి