ఎంసెట్‌ ‘అగ్రి’ పోటీలో 70 శాతం అమ్మాయిలే

ఈనాడు, హైదరాబాద్‌: ఎంసెట్‌ అగ్రికల్చర్‌ అండ్‌ మెడికల్‌ విభాగం పరీక్షకు దరఖాస్తు చేసిన అభ్యర్థుల్లో అమ్మాయిలే అధికంగా ఉన్నారు. ఈనెల 14 నుంచి ఎంసెట్‌ ప్రారంభం కానుంది. ఈసారి అగ్రి విభాగానికి మొత్తం 94,376 మంది దరఖాస్తు చేయగా వారిలో 65,626 మంది(70 శాతం) అమ్మాయిలు ఉండటం విశేషం. అదే సమయంలో ఇంజినీరింగ్‌ విభాగానికి మొత్తం 1,72,075 మంది పోటీ పడుతుండగా అందులో అమ్మాయిలు 67,589 మంది మాత్రమే ఉన్నారు. అంటే 39.27 శాతం. అగ్రి విభాగానికి అమ్మాయిల సంఖ్య కొన్నేళ్ల కిందటే అబ్బాయిల కంటే దాటిందని, అది క్రమేణా ఇప్పుడు 70 శాతానికి చేరిందని ఎంసెట్‌ వర్గాలు తెలిపాయి. మరోవైపు ఇంజినీరింగ్‌కు కూడా 40 శాతం వరకు ఉన్నారని, ఆ శాతం కూడా వచ్చే కొద్దేళ్లలో మరింత పెరుగుతుందని వారు చెబుతున్నారు. అందుకు ఐటీ కొలువుల్లో వారికి ప్రాధాన్యం పెరుగుతోందని, కొన్ని కంపెనీలు కనీసం మూడో వంతు అమ్మాయిలు ఉండాలన్న నిబంధన విధించుకుంటున్నాయని వర్సిటీ ఆచార్యులు విశ్లేషిస్తున్నారు. 2019లో ఇంజినీరింగ్‌లో 38.25 శాతం, అగ్రికల్చర్‌లో 68.90 శాతం మంది అమ్మాయిలు దరఖాస్తు చేశారు. అంటే క్రమేణా వారి శాతం పెరుగుతున్నట్లు స్పష్టమవుతోంది.